Líklegt er að Liverpool verði án Mohamed Salah þegar liðið hefur leik á næstu leiktíð, búið er að velja Salah í hóp Egyptalands fyrir Ólympíuleikana í sumar.
Keppnin á Ólympíuleikunum er fyrir leikmenn 23 ára og yngri, það má hins vegar velja þrjá eldri leikmenn og vilja Egyptar taka Salah með.
Salah er í hópnum sem Egyptaland hefur sett saman en knattspyrnusambandið á eftir að ræða málið við Liverpool. Talið er að Salah vilji fá tækifæri til að spila á Ólympíuleiknunum.
„Salah er einn af bestu leikmönnum heimsins, það er eðlilegt að við viljum taka hann með,“ sagði Shawky Gharib þjálfari liðsins.
„Við munum hefja viðræður við Liverpool eftir landsleikjahléið er á enda í mars.“
Ólympíuleikarnir í Tókýó fara fram 23 júlí til 8 ágúst og mun Salah því missa af undirbúningstímabili Liverpool og þar með upphafi ensku úrvalsdeildarinnar.
