Allt að átta górillur í San Diego Zoo Safari Park eru væntanlega smitaðar af kórónuveirunni sem veldur COVID-19. Þrjár þeirra hafa hóstað og sýnt merki þess að vera smitaðar. Þetta er í fyrsta sinn, svo vitað sé, sem smit berst í þessa tegund mannapa að sögn talsmanna dýragarðsins.

Talið er að aparnir hafi smitast af starfsmanni sem var með veiruna en var einkennalaus. Rannsóknir á saur apanna hafa sýnt að einn þeirra er örugglega smitaður. Þrír hafa sýnt sjúkdómseinkenni og talið er að allir átta séu smitaðir.

„Górillur lifa saman í hóp í dýragörðum og í náttúrunni og við verðum að reikna með, eins og við gerum við fjölskyldur fólks, að allir í fjölskyldunni séu smitaðir,“ segir í tilkynningu frá dýragarðinum. Einnig segir í henni að engin af górillunum virðist vera alvarlega veik og að reiknað sé með að þær nái sér allar að fullu.

Ekki er vitað hvaða sjúkdómseinkenni munu gera vart við sig hjá þeim eða hvaða áhrif veiran mun hafa á þær. Áður hafa ljón og tígrisdýr í dýragarði í New York greinst með veiruna og í Barcelona greindust fjögur ljón með hana.  Veiran hefur einnig borist í ketti og hunda og minka.