Styrmir Gunnarsson, fyrrverandi ritstjóri Morgunblaðsins, skrifaði pistil sem birtist á heimasíðu sinni í dag, þar sem hann ræddi stöðu stjórnarflokkanna eftir að Bjarni Benediktsson, fjármálaráðherra, var gripinn í 40-50 manna samkvæmi sem lögregla stöðvaði.
Styrmir bendir á að ungliðahreyfingar í stjórnmálunum hafi tjáð sig um málið, en hann veltir fyrir sér hvort að það muni hafa afleiðingar.
„Það er titringur í pólitíkinni eftir heimsókn fjármálaráðherra í Ásmundarsal á Þorláksmessu. Athygli vekur hvað ungliðahreyfingar stjórnmálaflokkanna láta mikið að sér kveða í sambandi við málið og ómögulegt að segja, hvort það á eftir að hafa frekari pólitískar afleiðingar.“
Þá spyr Styrmir sig hvort Vinstri grænir og Framsóknarflokkurinn muni snúa baki við Sjálfstæðisflokkinn, í ljósi þess að flokkarnir mælast með minna fylgi en áður og gæti það mögulega hjálpað með fylgissöfnun.
Að lokum segir hann málin muni skýrast þegar þingflokkarnir muni funda eftir jól, en hann segir það víst að fólkið í landinu sætti sig ekki við mál eins og það sem uppi er núna.
„Þegar hér er komið sögu og níu mánuðir í kosningar má búast við að hver fari að hugsa um sig. Bæði VG og Framsóknarflokkur hafa átt undir högg að sækja í skoðanakönnunum og gætu hugsað sem svo, að nú sé tækifæri til að rétta sig af.“
„Væntanlega skýrast málin frekar, þegar þingflokkar stjórnarflokkanna hafa haft tækifæri til að hittast eftir jólin og þingmenn bera saman bækur sínar um viðbrögð kjósenda.
En eitt er víst: Fólkið í landinu mun ekki hafa umburðarlyndi fyrir frekari uppákomum af þessu tagi.“
