Morgunblaðið skýrir frá þessu í dag. Fram kemur að nú sé til meðferðar stjórnarfrumvarp um tekjufallsstyrki og hafi Bandalag íslenskra leigubifreiðastjóra (BÍLS) sent inn athugasemd við það. Þar kemur meðal annars fram að leigubifreiðastjórar hafi orðið fyrir miklu tekjufalli í heimsfaraldrinum vegna lokana og annarra sóttvarnaaðgerða. Þeir hafi þraukað við erfiðar aðstæður, starfað í framlínunni, verið útsettir fyrir smiti og sinnt mikilvægu starfi eins og að aka sýnum til greiningarstöðva og flytja sjúklinga og flugfarþega í sóttkví. Þeir hafa einnig þurft að breyta bifreiðum sínum til að setja upp skilrúm og þetta hafi valdið aukalegum kostnaði auk kostnaðar við aðrar sóttvarnaaðgerðir.
Einnig kemur fram að leigubifreiðum í umferð hafi fækkað um tæplega 20% og að þeir bílstjórar sem enn eru við störf hafi miklu lægri tekjur en svo að þeir geti staðið undir rekstrarkostnaði og launum. Einnig segir að samdrátturinn, hvað varðar tekjur og fjölda ferða, sé um 80 til 90% frá miðjum mars. Óskar BÍLS því eftir að tillit sé tekið til leigubílstjóra og að þeir falli undir skilyrðin til að geta fengið tekjufallsstyrki.
