Í Norður-Kóreu eru fangar minna virði en dýr í augum einræðisstjórnarinnar. Þeir eru látnir sæta pyntingum, eru sveltir, beittir kynferðisofbeldi og þvingaðir til að játa á sig sakir.

Þetta kom fram í viðtölum mannréttindasamtakanna Human Rights Watch (HRW) við 15 fyrrum fanga í landinu en upplýsingarnar koma fram í nýrri skýrslu frá samtökunum. Í skýrslunni er meðferð á föngum lýst ítarlega.

Fram kemur að fangar séu sendir í yfirfull fangelsi þar sem alltof margir séu hafði saman í klefum þar sem þrifnaði sé ábótavant. Fólk er neytt til að játa sakir og neitað um mat og fatnað.

Phil Robertson, framkvæmdastjóri HRW í Asíu sagði að fangar svelti beinlínis í hel nema þeir geti mútað fangavörðum til að leyfa fjölskyldum sínum að senda þeim mat.

Einn fanganna, sem rætt var við, sagði að fangar séu einfaldlega „minna virði en dýr“

Skýrslan er byggð á samtölum við 15 fyrrum fanga, konur og karla, auk fyrrum embættismanna sem þekkja til réttarvörslukerfisins í landinu. Allir viðmælendurnir eru Norður-Kóreumenn sem flúðu land eftir 2011 en þá tók Kim Jong-un, núverandi einræðisherra, við völdum.

Robertson sagði að fólk sem er með góð pólitísk sambönd eða með nægilega peninga til að múta lögreglumönnum, fangavörðum og saksóknurum eigi möguleika á að þeim og fjölskyldum þeirra verði hlíft. Flestir geti búist við að sæta pyntingum, að vera neyddir til að játa sakargiftir og að vera troðið í yfirfulla fangaklefa. Þá eigi konur á hættu að vera nauðgað.