Yfir 50 eftirskjálftar hafa fundist eftir stóra skjálftann sem varð á Reykjanesskaga í öðrum tímanum í eftirmiðdaginn. Er eftirskjálftum ekki lokið. Engar tilkynningar hafa borist um meiðsl á fólki né tjón á mannvirkjum eftir því sem kemur fram í tilkynningu frá Almannavörnum, en þar segir:
„Jarðskjálfti af stærðinni M5.6 varð kl 13:43 í Núpshlíðarhálsi, 5 km vestur af Seltúni við vestanvert Kleifarvatn. Yfir 50 eftirskjálftar hafa fylgt í kjölfarið og fara fjölgandi. Jarðskjálftinn fannst víða á landinu og hafa borist tilkynningar um að myndir hafi fallið af veggjum og smáhlutir dottið úr hillum á Suður- og Vesturlandi. Engar tilkynningar hafa borist um meiðsli á fólki eða tjón á mannvirkjum.
Almannavarnadeild ríkislögreglustjóra fylgist vel með í samvinnu við lögregluembættin á höfuðborgarsvæðinu, á Suðurnesjum og á Suðurlandi auk Veðurstofunnar. Lögreglumenn munu fara um svæðið, meðal annars í Krýsuvík, til að kanna áhrif skjálftans.
Óvissustig almannavarna hefur verið í gildi á Reykjanesi vegna landriss á svæðinu síðan 26. janúar.“
https://www.facebook.com/Almannavarnir/posts/3770188656346223
