Rannsókn lögreglu stendur enn yfir á láti manns sem fórst er eldur kom upp í húsbíl í landi Torfustaða í Grafningi í Árnessýslu á föstudagskvöldið. Hefur lögregla ekki með endanlegum hætti borið kennsl á manninn og hefur því ekki gefið út nafn hans. Búast má við tilkynningu þess efnis fyrir lok vikunnar.

Sögur hafa verið á sveimi um manninn í ljósi þess að hann bjó í húsbíl og hins hörmulega veruleika atviksins. Snúast þær um að hann hafi verið utangarðsmaður og einstæðingur. Það mun ekki vera rétt. Samkvæmt heimildum DV var maðurinn 38 ára gamall, var hann ekki utangarðsmaður og ekki vímuefnaneytandi. Maðurinn stundaði atvinnu, var vinmargur og var í góðu sambandi við fjölskyldu sína og vini.

Er hans sárt saknað en ættingjar hans og vinir hafa kvatt hann hinstu kveðju á Facebook undanfarna daga. Í þeim kveðjum er honum lýst sem yndislegum manni, traustum vini, jákvæðum, glöðum og kraftmiklum.