Norska flugfélagið Norwegian rær nú lífróður og reynir allt hvað hægt er til að komast í gegnum þá erfiðu tíma sem nú ríkja í fluggeiranum. Nýlega bað félagið sænska ríkið um ríkisábyrgð vegna lántöku. Riksgälden, stofnunin sem afgreiðir slíkar beiðnir, hefur nú hafnað þessari beiðni og segir að fjárhagur félagsins sé svo slæmur að ekki sé hægt að veita því ríkisábyrgð.

Norskir fjölmiðlar skýra frá þessu.

Vegna heimsfaraldurs kórónuveirunnar hefur sænska ríkisstjórnin opnað fyrir að veita flugfélögum, sem hafa sænsk flugleyfi og/eða eru með stóran hluta af rekstri sínum í Svíþjóð, ríkisábyrgð. Hámark slíkra ábyrgða er 5 milljarðar sænskra króna.

Það var Norwegian Air Sweden AB, sem er dótturfyrirtæki Norwegian, sem sótti um ríkisábyrgðina.