Hlutdeild lífeyrissjóða í nýjum húsnæðislánum hefur hrunið frá ársbyrjun samhliða aukinni eftirspurn eftir óverðtryggðum lánum. Svo gæti farið að júní hafi verið fyrsti mánuðurinn í langan tíma þar sem uppgreiðslur eru meiri en ný útlán lífeyrissjóðanna.

Fréttablaðið skýrir frá þessu í dag. Fram kemur að nettó ný útlán lífeyrissjóða til heimila  hafi aðeins verið 918 milljónir króna í maí samanborið við að bankarnir lánuðu heimilunum 27,5 milljarða króna í júní. Tölur yfir útlán lífeyrissjóðanna í júní hafa ekki enn verið birtar en umsvif bankanna benda til að töluverður samdráttur sé hjá mörgum lífeyrissjóðum.

„Ef tölurnar fyrir útlán bankanna í júní eru réttar gæti hann orðið fyrsti mánuðurinn í langan tíma þar sem það eru meiri uppgreiðslur en útlán hjá lífeyrissjóðunum.“

Er haft eftir Ólafi Sigurðssyni framkvæmdastjóra Birtu lífeyrissjóðs.

Haft er eftir Hörpu Jónsdóttur, framkvæmdastjóra Lífeyrissjóðs starfsmanna ríkisins, að hún hafi merkt töluverðar uppgreiðslu sjóðsfélaga undanfarna mánuði. Bankarnir hafi lækkað vexti meira en lífeyrissjóðirnir.

„Án þess að hafa séð bækur bankanna er mín ágiskun sú að þeir eigi erfiðara með að koma peningum í vinnu því samdráttur í hagkerfinu gerir það að verkum að þeir lána ekki eins mikið til fyrirtækja en vextir á húsnæðislánum eru lækkaðir til að lána meira til heimilanna.“

Ef haft eftir Hörpu.