En nú er búið að upplýsa hver hin margumtalaða slóð er og hver sem er getur nýtt hana. Það er að minnsta kosti skoðun Torbjørn Bull Jessen, sérfræðings í rafmynt. Sjónvarpsstöðin NRK birti hluta dulkóðaðra skilaboða sem Hagen fjölskyldan hefur sent á Bitcoin-slóðina og segir sérfræðingurinn að enginn vafi sé á því að NRK hafi gert það auðveldara að finna slóðina og nú geti hver sem er sent skilaboð þangað.
Samskiptin á milli Tom Hagen og þeirra sem talið er að hafi rænt konu hans fóru fram með því að send voru dulkóðuð skilaboð í gegnum kerfi sem nýtt er til þess að millifæra rafmynt. Fyrirmæli um þetta komu fram í hótunarbréfi sem Tom Hagen fann á heimili sínu, á Sloravejen í Lørenskog, þegar hann kom heim að tómu húsi þann 29. október 2018.
Þegar fjölskyldan bað um að fá að sjá mynd af Anne-Elisabeth var svarið. „Ekki góður tími. Flýttu þér eða hún deyr“.
Í skilaboðunum kom fram að fjölskyldan gat aðeins notað sex ákveðnar setningar í samskiptum sínum. Hverjum skilaboðum fylgdi ákveðin bitcoin upphæð. Þeir sem skildu bréfið eftir höfðu sem sagt búið setningarnar til fyrir fram og þess vegna var ekki mögulegt að biðja um sönnun á því að hin horfna kona væri á lífi. Þess vegna millifærði fjölskyldan litla upphæð Bitcoin með dulkóðuðum skilaboðum þar sem beðið var um sönnun á því að Anne-Elisabeth væri á lífi. Til þess notuðu þau kóðann „CEE FACE AE“.
Það er einmitt birting þessara bókstafa sem vekur áhyggjur hjá sérfræðingnum. Hann segir að þeir sem sé færir í því að vinna með Bitcoin geti auðveldlega fundið slóðina, í raun sé þurfi bara að framkvæma leit í Bitcoin kerfinu.
