Niðurstöður nýrrar rannsóknar sýna að fjöldi Bandaríkjamanna hefur drukkið klór, skolað munn með efninu eða notað það til að þrífa sig eða mat sinn. Sumir hafa einnig andað að sér klórgufum. Þetta hefur fólkið gert í þeirri trú að þetta geti forðað því frá því að smitast af kórónuveirunni sem veldur COVID-19.

Sky skýrir frá þessu. Fram kemur að rannsóknin hafi verið unnin fyrir US Centers for Disease Control and Prevention. Niðurstöðurnar sýna að 39% aðspurðra sögðust hafa gripið til heilsufarslegra aðgerða sem stofnunin telur hættulegar. Rannsóknin var gerð í maí, skömmu eftir að Donald Trump, forseti, varpaði þeirri spurningu fram hvort það gæti unnið á kórónuveirunni að innbyrða klór.

502 tóku þátt í rannsókninni. 19% sögðust hafa sett klór á mat, þar á meðal ávexti og grænmeti, 18% sögðust hafa notað þrifaefni, sem eru ætluð til heimilisþrifa, og sótthreinsandi efni á húð sína. 4% höfðu drukkið eða skolað munninn með klór, sápuvatni eða sótthreinsiefnum. 6% höfðu andað að sér gufum frá þrifaefnum eða sótthreinsiefnum. 10% sögðust hafa sett hreinsi- eða sótthreinsiefni á líkama sinn. Sérfræðingar hafa varað mjög við þessu.