Um kvöldmatarleytið í gær var tilkynnt til lögreglu um hugsanlegan fund á mannabeinum við gröft í garði. Við nánari athugun er talið að um bein úr hundi sé að ræða en ekki mannabein.
Þetta kemur fram í dagbók Lögreglunnar á höfuðborgarsvæðinu.
Um áttaleytið í gærkvöld var tilkynnt um mann í annarlegu ástandi að ganga í veg fyrir bíla og munda fingur að bílunum eins og hann væri að skjóta. Ekki voru frekari upplýsingar bókaðar um þetta atvik.
Þá segir einnig frá því að á tólfta tímanum í gærkvöld var tilkynnt um hópslagsmál í hverfi 103. Um var að ræða samstarfsmenn sem vildu ekki aðstoð lögreglu. Fóru þeir hver í sína áttina, að því er segir í dagbókinni.
Einnig var tilkynnt um hópslagsmál í miðborginni, fyrir utan skemmtistað. Voru slagsmálin yfirstaðin og slagsmálahundar farnir á brott þegar lögregla kom á vettvang.
Maður í annarlegu ástandi, sem búinn var að afklæðast, öskraði á fólk í miðborginni. Ekki eru frekari upplýsingar bókaðar um þetta mál hjá lögreglu.
Nokkrar tilkynningar voru um að kveiktur hefði verið varðeldur, til dæmis í Elliðaárdal. Í einhverjum tilvikum um að ræða ungmenni að fagna próflokum. Slíkt er að sjálfsögðu bannað.
Þá voru allnokkur tilvik um akstur ökumanna undir áhrifum fíkniefna eða áfengis, sem og tilkynningar um partýhávaða í heimahúsum.
