Ásmundur Friðriksson þingmaður Sjálfstæðisflokksins neitaði að greina Fréttablaðinu frá hversu háar upphæðir hann fékk greiddar frá ríkinu vegna starfa sinna sem þingmaður en þingmenn geta haldið akstursdagbækur og fengið endurgreiddan ýmis kostnað. Athugun Fréttablaðsins leiðir í ljós að þingmenn í Suðurkjördæmi, kjördæmi Ásmundar hafa fengið mun hærri endurgreiðslur en aðrir þingmenn.

Ásmundur kveðst fara eftir lögum og reglum og enginn hafi gert athugasemdir hvernig hann hafi notað sinn bíl. Sveinn Arnarsson blaðamaður Fréttablaðsins spurði þá hvort Ásmundur væri til í að upplýsa hversu mikið hann hefði ekið og hvað upphæðin hefði verið há. Við því vildi þingmaðurinn ekki verða.

„Þið eruð ekki að spyrja hvað lögfræðingarnir frá Rauða krossinum eru að fá fyrir að senda bréf til innanríkisráðuneytisins vegna hælisleitenda, er það? Þið viljið ekki að þeir missi spón úr aski sínum?“

Þetta svar Ásmundar hefur vakið mikla athygli. Helga Vala Helgadóttir sem kosin var á þing fyrir Samfylkinguna um síðustu helgi vandar Ásmundi ekki kveðjurnar. Helga Vala segir:

„Ásmundur Friðriksson, þingmaður Sjálfstæðisflokks nær hæstu hæðum í viðbrögðum sínum við ósköp eðlilegri spurningu blaðamanns um aksturskostnað hans á þinginu. [Hann] Dylgjar þar, enn einu sinni, um sporslur til lögfræðinga Rauða krossins vegna starfa þeirra í þágu umsækjenda um alþjóðlega vernd hér á landi.“

Þá segir Helga Vala að lokum:

„Lögfræðingar RK fá engar slíkar sporslur og það ætti hann auðvitað að vita, eða veit fullvel. Hefur þessi þráhyggja þingmannsins nú náð þeim stað að bera fólk á flótta undan stríði og ofsóknum saman við íslenskan þingkarl á ferðum sínum um kjördæmið… hvor ætli þurfi frekar á aðstoð að halda?“