„Ef við ætlum á þá braut að skilgreina félagið sem kerfislega nauðsynlegt og dæla í það skattpeningum þá þarf að fara alla leið og taka það algerlega yfir. Og þá finnst mér einnig að skattgreiðendur ættu að fá hlut í eignarhaldinu á móti,“ segir Ögmundur Jónasson fyrrverandi ráðherra, í viðtali við helgarblað DV. Ögmundur fer þar yfir leiðir sem hann telur æskilegar til að bregðast við þeirri djúpu efnadagskreppu sem kórónuveiran er að leiða yfir íslenskt samfélag.
Styrkur ríkisvaldsins til fyrirtækja til greiðslu launa á uppsagnarfresti mun hafa í för með sér um 7 milljarða kostnað skattgreiðenda vegna Icelandair. Talið er líklegt að ríkið veiti Icelandair stórt lán eða styrk samhliða hlutfjáraukningu félagsins sem verið er að vinna að.
Ögmundur telur krísuna vegna COVID-19 vera tilefni til róttækrar endurskoðunar á þeim grunninnviðum sem mynda samfélagið. Hann sagði Eyjunni frá því sem hann telur nauðsynlegt að gera til að bjarga Íslandi.
Meðal annars vill Ögmundur fjölga starfsmönnum hins opinbera líkt og Samfylkingin hefur talað fyrir:
„Þessi krísa kennir okkur að heilbrigðiskerfi á vegum hins opinbera stendur á sterkari fótum en hins markaðsdrifna, líkt og Bandaríkjamenn eru að uppgötva nú. Það þarf að búa betur að innviðum okkar, eins og löggæslu. Ef það kallar á meira starfslið, þá er það samfélaginu til góðs. En því miður er ríkið í augum margra hægri manna af hinu illa, þangað til þeir leggjast inn á sjúkrahús, líkt og Boris Johnson komst að á dögunum.“
