Aðeins 99 farþegar fóru um Keflavíkurflugvöll frá skírdegi og fram á annan dag páska. Á síðasta ári fóru 84.000 farþegar um völlinn þessa sömu daga. Þetta hefur að vonum mikil áhrif á rekstur Isavia sem á og rekur flugvöllinn.

Þetta kemur fram í umfjöllun Morgunblaðsins um málið í dag. Þar er haft eftir Sveinbirni Indriðasyni, forstjóra Isavia, að ef flugsamgöngur verði áfram í lamasessi muni ganga hratt á lausafé fyrirtækisins sem var um níu milljarðar um áramótin. Mikill fastur kostnaður fylgir rekstri flugvallarins og dugir lausafé Isavia til reksturs næstu fimm mánuði. Af þeim sökum er nú unnið að því að styrkja fjárhagsstöðu fyrirtækisins enn frekar að sögn Sveinbjarnar.

Haft er eftir honum að algjör óvissa sé um hvenær og hvernig farþegaflug muni hefjast á nýjan leik. Ef litið sé til síðasta árs megi vænta þess að farþegum muni fækka um meira en helming á milli ára. 7,2 milljónir farþega fóru um völlinn á síðasta ári og hafði þá fækkað um 28% frá 2018.

Að meðaltali störfuðu 1.360 manns hjá Isavia á síðasta ári. 101 starfsmanni var sagt upp í síðasta mánuði en fyrirtækið hefur lagt áherslu á að varðveita störfin á flugvellinum. Haft er eftir Sveinbirni að ef umsvifin aukist ekki innan fárra mánuði þurfi jafnvel að grípa til frekari uppsagna.