Magnús Karl Magnússon, prófessor í lyfja- og eiturefnafræði við Háskóla Íslands, varar við sjálfskipuðum veirufræðingum á internetinu og hugmyndum þeirra um hvernig bregðast eigi við ástandinu sem skapast hefur vegna Covid-19 faraldursins.
Hann skrifar um þetta í færslu á Facebook:
„Ágætu internet-veirufræðingar: Samfélag okkar stendur frammi fyrir flóknu og vandasömu verkefni. Samstaða, fagmennska, æðruleysi, kjarkur og dómgreind eru dæmi um eiginleika sem munu koma okkur gegnum þetta tímabundna en erfiða ástand. Yfirvöld munu þurfa að taka ákvarðanir sem eru flóknar, það er að segja ákvarðanir þar sem ekki er beinlínis til eitt augljóst svar við. Við munum eðli málsins samkvæmt ekki vita hvort ákvörðunin sé rétt á þeim tímapunkti sem hún er tekin,“
segir Magnús.
Hann minnir á Dunning – Kruger áhrifin og útskýrir í hverju þau felast, en nefna mætti þau sem einskonar besservisser áhrif, sem margir eru haldnir hér á landi:
„Ég vil því biðja þá sem alltaf vita hvert er rétta svarið eða eru alltaf tilbúnir til að krítísera allar ákvarðanir að staldra við eitt augnablik. Dunning-Kruger áhrifin eiga svo sannarlega við núna, en Dunning-Krueger er hugsanavillan sem á við þegar þeir sem minnst vita, telja sig best vita (sjá meðfylgjandi mynd).
Að lokum segir Magnús að stjórnvöld séu að gera vel og sýni góða dómgreind í erfiðri stöðu:
„Mér sýnast heilbrigðisyfirvöld hafa sýnt góða dómgreind. Ég veit að þar höfum við geysilega gott fagfólk í broddi fylkingar. Ég veit líka að þar eru einstaklingar sem liggja talsvert langt til hægri á kúrfunni á meðfylgjandi mynd. Munum að rétt eins veirur sem smitast frá einum einstaklingi til annars, þá gera hugmyndir það líka. Við megum ekki við því að blanda saman hættulegum veirum við illa ígrundaðar hugmyndir frá fólki sem alltaf þykist best vita. Sýnum frekar okkur bestu hliðar.“
