Í umfjöllun Sky um málið kemur fram að ný rannsókn hafi leitt í ljós að það verði sífellt erfiðara fyrir flugvélar að taka á loft vegna hlýrra lofts og breytilegra vinda. Í skýrslunni kemur fram að hugsanlega verði að takmarka fjölda farþega í flugvélum sem er flogið til og frá flugvöllum með stuttar flugbrautir. Annar möguleiki er að vélarnar taki minna eldsneyti fyrir hverja ferð og að flogið verði til færri áfangastaða en nú er gert.
Haft er eftir Paul Williams, loftslagssérfræðingi og einum skýrsluhöfunda, að heitt loft og hægir vindar geri að verkum að erfiðara sé fyrir flugvélar að taka á loft. Svo sé að sjá sem loftslagsbreytingarnar séu að valda bæði hlýrra lofti og hægari vindum.
Hann sagði að það væri einnig mögulegt að minnka það magn eldsneytis sem er tekið á vélarnar hverju sinni en það setji þeim ákveðin takmörk varðandi drægi. Enn annar möguleiki sé að lengja flugbrautir þannig að vélarnar geti farið enn hraðar þegar þær taka á loft.
Niðurstöður rannsóknarinnar voru birtar í tímaritinu Climatic Change. Hún var unnin út frá gögnum um veðurfar síðustu 60 ár og gögnum frá 10 grískum flugvöllum.