Pilturinn var ásamt jafnaldra sínum og vini í snjóbrettaferð á Whitewater-skíðasvæðinu, skammt frá borginni Nelson, þegar þeir villtust. Piltarnir fóru út fyrir merkt svæði síðastliðinn sunnudag með þeim afleiðingum að þeir komust ekki til baka. Mjög kalt var í veðri á þessum slóðum og enduðu piltarnir á að dvelja utandyra úti í óbyggðum aðfaranótt mánudags.
Þyrluflugmenn sem leituðu piltanna komu þeim til bjargar á mánudagsmorgun og voru þeir þá orðnir nokkuð kaldir.
Það sem varð piltunum ef til vill til lífs, eða kom í veg fyrir alvarleg kalsár að minnsta kosti, var að annar þeirra var með með skólatöskuna sína meðferðis. Í töskunni voru bækur og heimaverkefni sem piltarnir ákváðu að brenna til að halda á sér hita.
„Þeir gerðu allt rétt,“ segir Jim Kyle, forsvarsmaður björgunarsveitarinnar í Nelson, í samtali við Nelson Daily. Piltarnir voru fluttir til aðhlynningar á sjúkrahús en þeir fengu að fara að lokinni skoðun.
