Kóralrif, hvítar strendur, fagurblár sjórinn og fullkomið hitabeltisloftslag. Seychelles-eyjar í Indlandshafi er staður sem að mörgu leyti mætti líkja við paradís á jörð. Lífið er þó enginn draumur hjá mörgum íbúum því margir eru háðir að heróíni.
Breska ríkisútvarpið, BBC, fjallaði um þetta.
Íbúar á Seychelles-eyjum, sem eru um 1.600 kílómetra austan við meginland Afríku, eru um 96 þúsund talsins. Talið er að fimm til sex þúsund íbúar glími við heróínfíkn en það samsvarar tíu prósentum af þeim sem eru á vinnumarkaði. Hvergi í heiminum er talið að heróínvandi sé hlutfallslega meiri en á Seychelles-eyjum.
Í skýrslu sem yfirvöld gáfu út nýlega kom fram að flestir þeirra sem ánetjast heróíni séu ungir og ómenntaðir karlmenn. Seychelles-eyjaklasinn samanstendur af 115 eyjum sem gerir yfirvöldum erfitt um vik að haldleggja efni sem smyglað er til eyjanna.
Á síðasta ári breyttu yfirvöld um stefnu með það að markmiði að fækka fíklum. Í stað þess að taka upp harðari refsingar gegn fíkniefnaneytendum fóru yfirvöld að líta á vandann sem heilbrigðisvandamál. Býðst heróínneytendum nú að fá meþadón með það að marki að hætta notkun heróíns. Þá býðst öðrum skaðaminnkunarúrræði, en þá fær fólk hreinar sprautur og getur notað efnin undir haldleiðslu heilbrigðisstarfsfólks.