Bandaríski bílaframleiðandinn Ford ætlar að leggja talsverða áherslu á þróun og framleiðslu rafbíla á næstu árum. Á sunnudagskvöld afhjúpaði Ford til dæmis Mustang-sportbíl, Mustang Mach E, sem verður eingöngu rafknúinn.

Ef fer sem horfir mun bíllinn komast 230 til 300 mílur (370-480 kílómetra) á hleðslunni en það fer meðal annars eftir aukabúnaði hvað bíllinn kemst langt. Bæði verður framleiddur skutbíll og bíll sem verður líkari þeim sem Mustang-unnendur eiga að venjast.

Aðeins 1,2 prósent nýrra seldra bíla í Bandaríkjunum árið 2018 voru rafbílar og flest bendir til þess að hlutfallið verði svipað á þessu ári. Á næstu tveimur árum er þó viðbúið að þetta muni breytast því þá mun Ford markaðssetja fjölda rafbíla.

Að sögn forsvarsmanna Ford mun Mustang Mach E-rafbíllinn búa yfir svipuðum eiginleikum og hefðbundnir Mustang-bensínbílar. Grunnútgáfan mun komast á 60 mílna hraða (96 kílómetra hraða) á rétt tæpum sex sekúndum en GT-útgáfan verður öllu sneggri, eða 3,5 sekúndur.

Átján tegundir rafbíla eru nú til sölu á bandarískum markaði en greinendur segja að holskefla nýrra rafbíla komi á markað á næstu árum. Árið 2022 er gert ráð fyrir að allt að 80 tegundir verði á markaði.