Lilja Alfreðsdóttir, mennta- og menningarmálaráðherra, útilokar ekki að hin umdeilda fjölmiðlanefnd verði lögð niður. Hún segir við RÚV að vinna við fjölmiðlafrumvarpið feli í sér endurskoðun á fjölmiðlanefnd:

„Eins og þið þekkið þá hafa verið miklar breytingar á fjölmiðlamarkaðinum og við höfum verið að vinna að frumvarpi til að styðja betur við einkarekna fjölmiðla þannig í anda þess vil ég líka endurskoða fjölmiðlalögin og þar er auðvitað fjölmiðlanefnd undir.“

Sem stendur er nýskipuð nefnd ekki fullskipuð samkvæmt lögum, þar sem Blaðamannafélag Íslands neitar að tilnefna fulltrúa sinn í nefndina í mótmælaskyni við tilurð hennar og hlutverk, en það dró fulltrúa sinn til baka í mars.

Treystir nefndinni

Nefndina skipa þrír lögmenn og einn heimspekiprófessor, en samkvæmt lögum þurfa fimm að skipa nefndina. Hafa nefndarmenn legið undir gagnrýni fyrir að hafa ekki sérþekkingu á fjölmiðlum, þar sem þeir hafi ekki starfað sem slíkir.

Lilja segir við RÚV að hún treysti þeim þó algerlega:

„Við höfum fengið þar til liðs okkur mjög hæft fólk sem hefur sérþekkingu á fjölmiðlamálum, til að mynda formaðurinn, hann kom að gerð frumvarps um stuðning við einkarekna fjölmiðla þannig ég er mjög sátt við þá einstaklinga sem skipa nefndina.“

Aðspurð hvort skipanin standist lög meðan enn vantar einn, segir Lilja:

„Ég hef fengið þær ráðleggingar að við þurfum auðvitað að byrja á því að gera þetta sem við þurfum að gera, ég hef verið að hvetja Blaðamannafélag Íslands til að taka þátt í nefndinni og þetta er allt núna til skoðunar.“