Jóhannes Karl Guðjónsson átti frábæran feril sem leikmaður en hann er í dag þjálfari ÍA í efstu deild hér heima.
Jói Kalli var gestur í hlaðvarpsþættinum frábæra Draumaliðið þar sem hann fer yfir málin með Jóa Skúla sem sér um þáttinn.
Hann ræddi kynni sín af goðsögninni Andy Cole sem gerði garðinn frægan með Manchester United og Newcastle.
Cole stoppaði einnig stutt hjá Burnley árið 2008 og lék þá með Jóa Kalla í næst efstu deild.
Cole var lánaður til Burnley frá Sunderland og er óhætt að segja að hann hafi verið spes karakter.
,,Hann kom í restina á einu tímabili og það var skemmtilegur karakter sem kunni að skora mörk,“ sagði Jói Kalli.
,,Mesti glansinn var farinn af honum en hann bjó alltaf í Manchester og ferðaðist alltaf á milli.“
,,Hann var með einkabílstjóra á þessum tíma og ég gleymi því aldrei eftir eina æfinguna þegar hann labbaði út að bílnum sínum og var með einhvern svona stóran ‘van’.“
,,Þar voru engin sæti aftur í heldur bara dýna, koddi og bara rúm. Hann henti sér bara aftur í bílinn og svaf á leiðinni á æfingar og hafði það huggulegt.“
