Pétur Eyvindsson, starfsmaður Reykjavíkurborgar, deilir skjáskoti af fyrirspurn sinni á vefsvæði Ríkisskattstjóra inn í Sósíalistaflokk Íslands á Facebook, hvar hann spyr hvort verið sé að rannsaka Agnar Tómas Möller, einn af stofnendum GAMMA og fyrrverandi sjóðstjóra og framkvæmdastjóra sjóða félagsins. Ef ekki, telji hann tilefni til þess og vísar í tekjublað Stundarinnar sem birti laun Agnars.

Agnar, sem var áður í áhættustýringu hjá Kaupþingi, hætti störfum hjá GAMMA í maí og fór yfir til Júpíters, sem forstöðumaður skuldabréfa, en Júpíter er félag í eigu Kviku banka.

Pétur skrifar til Ríkisskattstjóra að hann telji fulla ástæðu til að „skoða“  Agnar og vonar að starfsmenn Ríkisskattstjóra séu faglegir en ekki „innmúraðir spillingarpésar flokksins.“

Nokkur reiði ríkir á samfélagsmiðlum vegna hruns sjóða GAMMA frá áramótum, úr 4.4 milljörðum niður í 40 milljónir. Hafa margir spurt sig hvernig þetta hafi getað gerst og hvort eitthvað misjafnt hafi átt sér stað. Hafa þingmenn kallað eftir rannsókn á málinu.

Hér að neðan má sjá skjáskot af beiðni Péturs.