Dagur B. Eggertsson borgarstjóri, sem sætt hefur harðri gagnrýni fyrir að bregðast of seint við húsnæðiskreppunni og einblínt á lúxusíbúðir í miðbænum í stað lítilla og ódýrra íbúða fyrir fyrstu kaupendur, mundar lyklaborðið í dag vegna úttektar Samtaka iðnaðarins á íbúðum í byggingu.
Í henni segir að viðsnúningur hafi orðið, þar sem nú séu 2.4 prósent færri íbúðir í byggingu á höfuðborgarsvæðinu en í fyrra:
„Talningar SI á íbúðum í byggingu hafa undanfarin ár borið með sér að framundan væri vaxandi fjöldi fullbúinna íbúða að fara á markað. Nú virðast hins vegar vera ákveðin vatnaskil í þessum tölum sem benda til þess að fjöldi fullbúinna íbúða kunni að fækka á næstu misserum. Endurspeglast þetta í spá SI um fjölda fullbúinna íbúða 2019-2021./
Talningin sýnir að viðsnúningur er í íbúðabyggingum en á sama tíma í fyrra mældist 18,6% fjölgun íbúða í byggingu á svæðinu. Fækkun er fyrst og fremst í nágrannasveitarfélögum höfuðborgarsvæðisins en viðlíka fjöldi af íbúðum er nú í byggingu á höfuðborgarsvæðinu og í mars sl. samkvæmt talningunni. Niðurstaða talningarinnar endurspeglar þéttingastefnu stærstu sveitarfélaga á höfuðborgarsvæðinu þar sem ríflega helmingur allra íbúða í byggingu í Reykjavík og Kópavogi eru á slíkum reitum.“
Þá er greint frá því að fækkunin sé mest í íbúðum á fokheldum íbúðum, eða 18.3 prósent, samanborið við 28% vöxt á síðasta ári:
„Í heild hefur íbúðum á þessu byggingarstigi því fækkað um 20,2% á einu ári. Af niðurstöðum talningarinnar má dæma að byggingaraðilar eru að öllum líkindum að bregðast við breyttum horfum í efnahagsmálum.“
Borgarstjóri túlkar talninguna hinsvegar sér í hag þar sem um 400-500 íbúðir vanti í tölur Samtaka iðnaðarins:
„Reykjavík er eina sveitarfélagið þar sem íbúðum í byggingu fjölgar miðað við nýja talningu Samtaka iðnaðarins sem birt var í morgun. Líkt og áður telja SI ekki stúdentaíbúðir og hjúkrunaríbúðir þannig að á bilinu 400-500 nýjar íbúðir í byggingu vantar inn í tölurnar frá Reykjavík. Það væri kostur ef gögnin væru birt jafn ítarlega og gert var fyrir nokkrum árum en þá var jafnframt hægt að skoða þau á kortagrunni. Punkturinn varðandi fjölgun íbúða í Reykjavík kemur ekki fram í fréttatilkynningu né í fréttum hingað til en hægt er að sjá hana á skýringarmynd þegar greiningin er skoðuð.“
