„Mikið hryggir þetta mig , og mikið er hundfúlt að segja I told you so, en við þessu varaði ég og gott fólk í litlum flokki á þingi sem hét Björt Framtíð. Kísilmálver á Bakka er, og var alveg frá byrjun vond hugmynd. Keyrð áfram af fólki til að koma eitthvað um þúsund atkvæðum í NA kjördæmi í kassann hjá umhverfisflokknum VG.“

Svo skrifar Björt Ólafsdóttir, fyrrverandi umhverfis- og auðlindaráðherra Bjartrar framtíðar, vegna frétta þess efnis að kísilver PCC á Bakka þurfi aukið fjármagn, allt að fimm milljarða, til að tryggja reksturinn, en kísilverið hefur mætt mikilli gagnrýni á liðnum árum.

Björt segist ekki vita til hvaða stjórnmálamanna megi höfða til varðandi kísilverið, þar sem hægri menn hafi ekki mikinn áhug á umhverfismálum, heldur horfi meira í peninginn. Þá hafi málið verið keyrt áfram af VG:

„Fljótt tiltekið held ég að stjórnvöld hafi látið almenning borga um 40-70 milljarða í meðgjöf með þessu öllu. Það er einn Landspítali svona til samanburðar,“

segir Björt og nefnir að kísilverið sé ein stór hýt sem muni alltaf vilja meira og meira:

„Svo var líka vitað að PCC vill stækka, og það er næsta víst að þeir munu leggja áherslu á það svo að starfsemin „geti frekar orðið arðbær“ þá þarf almenningur í gegn um Landsvirkjun að skuldsetja sig enn meira vegna virkjana sem til þarf. Og fyrir hvað? Sótsvart mengandi iðnaðarver, sem rekur sig ekki. Og almenningur er aftur látin borga því að stærstu lífeyrissjóðum landsins fannst þetta frábært fjárfestingatækifæri. Lífeyrinn sem þú vinnur þér inn um hver mánaðarmót átti að ávaxtast þarna. En það gerir hann nefnilega ekki miðað við þessar áætlanir. Þá eruð þið beðin um að borga meira inn, leggja meira að veði. Vill fólk það?“