Franska varnarmálaráðuneytið tilkynnti í gær að leitarskipið Seabed Constructor hefði fundið franskan kafbát, Minerve, sem hvarf á dularfullan hátt í Miðjarðarhafi fyrir 51 ári. Florence Parly, varnarmálaráðherra, sagði þetta stóran áfanga, létti og tæknilegt afrek.

Kafbáturinn hvarf þann 17. janúar 1968 nærri höfninni í Toulon. 52 voru í áhöfn. Þrátt fyrir ítrekaðar tilraunir til að finna kafbátinn tókst það ekki fyrr en nú. Í ársbyrjun tilkynnti Parly að ný leit yrði gerð að kafbátnum og yrði nýjasta tækni notuð við hana. Ákvörðunin var tekin eftir mikinn þrýsting frá ættingjum áhafnarmeðlima.

Það var áhöfn Seabed Constructor, sem er í eigu Ocean Infinity, sem fann kafbátinn í 45 kílómetra fjarlægð frá Toulon og liggur hann á 2.370 metra dýpi.