„Þessi skilaboð verða að komast áleiðis, það veit eiginlega enginn hvað þetta er eða um hvað þetta snýst,“ segir Jón Gnarr grínisti, rithöfundur og fyrrverandi borgarstjóri en hann óskar eftir aukinni umræðu og vitundarvakningu um þær hættur sem steðja að jörðinni. Jón dvelur um þessar mundir í Houston í Texas ríki þar sem hann sinnir ritstörfum en í nýlegu viðtali sem birtist á vef Houston Chronicle ræður hann meðal annars um loftlagsbreytingar. Segir hann Houston og Ísland eiga eitt sameiginlegt: það sé erfitt að vekja áhuga fólks á hlýnun jarðar.
Í viðtalinu er meðal annars komið inn á borgarstjóratíð Jóns og sjónvarpsþættina Borgarstjórinn sem Jón byggði á eigin reynslu og fór einnig með aðalhlutverkið. Jón segir pólitíkina ekki vekja áhuga sinn lengur, heldur brennur hann fyrir því að opna umræðuna um loftlagsbreytingar.
„CNN sagði Ísland vera miðpunkt loftslagsbreytinga, vegna þess að það er svo sýnilegt,“ sagði Jón og vísaði þar í nýlegt sýndarveruleika-myndband CNN sjónvarpstöðvarinnar sem ber yfirskriftina „Ísland er að bráðna.“ Í myndskeiðinu kemur fram að hlýnun jarðar hafi valdið hækkun hitastigs á Norðurslóðum um tvær gráður og er afleiðingin sú að jöklar á Íslandi eru á barmi bráðnunar og munu smám saman hverfa. Myndbandið má finna hér.
Líkt og Jón bendir á eru breytingarnar að eiga sér stað nánast fyrir framan augu Íslendinga.
„En á meðan flestir Íslendingar trúa því að loftlagsbreytingar eru raunverulegar þá eru samt ekki allir sammála um að hér sé eitthvað slæmt á ferð.“
Sigmundur Davíð Gunnlaugsson, þáverandi forsætisráðhhera Íslands lét þau ummæli falla árið 2014 að í loftslagsbreytingunum fælust tækifæri fyrir Ísland,meðal annars til aukinna umsvifa í matvælaframleiðslu. Vísaði hann til til kenninga um að á meðan ríki nærri miðbaugi jarðar muni á næstu áratugum glíma við ýmiss konar vandamál muni hagsæld aukast í löndum á norðurslóðum, meðal annars á Íslandi.
Jón kveðst vissulega hafa notið góðs af auknu hitastigi á Íslandi og nefnir sem dæmi að hann hafi fyrir tveimur árum gróðursett eplatré sem síðan hafi vaxið með góðum árangri. Slíkt hefði ekki verið mögulegt á Íslandi fyrir 10 eða 15 árum.
Jón kveðst hafa leitað leiða til að opna á umræðuna um málefnið en hann telur það seint skila árangri að predika yfir fólki. Hentugri leið að hans mati er að sjá spauglegu hliðina á hlutunum.
„Þannig að ég ætla að reyna að finna húmorinn í þessu. Reyna að fá fólk til að hlæja að þessu og kanski fræðast örlítið.“
