Marteinn Mosdal, hinn skeleggi talsmaður Ríkisflokksins, segir á Facebook að flokkurinn hafi tekið uppsvokallaðan fituskatt. Markmiðið sé að rétta af hlut ríkissjóðs:
„Á meðan þegnar landsins fitna þá rýrnar ríkissjóður dag frá degi. Þetta ójafnvægi getur ekki staðið mikið lengur. Því hef ég … ég meina Ríkisflokkurinn tekið upp fituskatt til þess að rétta af hlut ríkissjóðs. Nú verða þegnar landsins að greiða fyrir hvert kíló sem þeir vega. Offitusjúklingar munu því borga meira en fólk sem er í kjörþyngd. En allir verða að borga fyrir sín kíló. Enda eru kíló ónýttur tekjustofn fyrir ríkið,“
segir Marteinn og nefnir að tekjur af skattinum muni verða nýttur í ferða-og risnusjóð stjórnmálamanna:
„Tvær flugur eru slegnar með einu höggi með þessum skatti. Þetta virkar hvetjandi á fólk til þess að léttast og þetta minnkar álag á ríkissjóð, vegna ferða og risnu. Undanþegnir þessum skatti eru stjórnmálamenn. Fyrstu fimm kílóin eru frí.“
Til að taka af allan vafa, þá er Marteinn Mosdal ein dáðasta persóna Ladda, Þórhalls Sigurðssonar, eins ástsælasta leikara/grínista landsins og því augljóslega um grín að ræða. Ekki er þó vitað hver stendur að síðunni, en Þórhallur sonur Ladda, sagði við Eyjuna að hún væri ekki á vegum þeirra feðga.
Hinsvegar má setja þetta glens í samhengi við sykurskattinn sem Svandís Svavarsdóttir og Landlæknisembættið hyggjast koma á í nafni lýðheilsusjónarmiða, en ekki eru allir á eitt sáttir með þær fyrirætlanir og segja skattinn leggjast þyngst á tekjulága, hann feli í sér mismunun og skerði samkeppnisstöðu. Þá sé það almennings, ekki ríkisins, að stjórna eigin neysluháttum.
Þannig má líta á glensið sem ádeilu, enda virðast margir hnussa við sykurskattinum, líkt og líklega margir myndu gera einnig, ef tekinn yrði upp fituskattur fyrir alvöru.
