Flestir eyða löngum stundum umkringdir ókunnugu fólki, það getur verið í strætisvagni, á kaffihúsi nú eða í matvöruversluninni. En samt sem áður eru margir nánast einangraðir innan um ókunnuga því þeim finnst óþægilegt að gefa sig á tal við ókunnuga, það er að minnsta kosti tilfinning margra. En kannski er alveg óþarfi að hafa áhyggjur af þessu og kannski á þessi tilfinning ekki við nein rök að styðjast.

Í umfjöllun BBC um málið kemur fram að fólk vanmeti oft jákvæð áhrif þess að ná sambandi við annað fólk og að það séu jákvæð áhrif á báða bóga. Það að ræða við ókunnugan á leið til vinnu getur látið fólki líða betur en ella.

Í tilraun, sem gerð var, kom í ljós að í almenningssamgöngufarartækjum var fólk yfirleitt meira en tilbúið að ræða við sessunaut sinn ef hann gaf sig á tal við það. Þetta bendir að sögn til þess að við vanmetum stöðugt áhuga ókunnugra á að ræða við okkur.

Við erum í grunninn félagsverur og erum hamingjusamari þegar við tölum við og eigum í samskiptum við annað fólk. Að finnast maður vera einangraður og einmana eykur á stress og getur ógnað líkamlegri heilsu eins og reykingar og offita. Það að eiga í samskiptum við annað fólk hefur stundum verið sagt vera lykillinn að hamingju.