Ástin blómstrar svo sannarlega í sumar og fjölmargir sem skipuleggja nú brúðkaup. Meðal þeirra eru tvö stjörnupör sem bæði eru á kafi í tónlistarbransanum, annars vegar Karl Olgeirsson og Sigríður Eyrún Friðriksdóttir og hins vegar Salka Sól Eyfeld og Arnar Freyr Frostason. Vill svo skemmtilega til að pörin gifta sig sama dag. Karl segir frá því í Fréttablaðinu að það sé hart barist um brúðkaupsgesti.
„Svolítið fyndið, Salka Sól og Arnar eru einmitt að fara að gifta sig sama dag og við. Nú er er maður bara byrjaður að reyna að sannfæra sameiginlegu gestina með mútum svo þeir mæti frekar til okkar,“ segir hann í góðu gríni.
Í viðtali við Fréttablaðið segir Karl að hann sé á leiðinni í tíu daga ferð til Hong Kong með Vesturporti að sýna verkið Í hjarta Hróa hattar. Hann er tónlistarstjóri sýningarinnar og Salka Sól samdi alla tónlistina. Þau Salka og Arnar fara einmitt líka til Hong Kong í þessa sömu vinnuferð.
„Þau koma einmitt líka með til Hong Kong svo við verðum að halda samskiptunum góðum.“