Simon Cowell ákvað að breyta mataræðinu eftir að meiðsli létu hann hugsa um hversu óheilbrigður lífsstíll hans var. Nú hefur hann hætt að borða kjöt, mjólkurvörur og hveiti og ætlar að segja einnig skilið við fisk.

Tónlistarmógúllinn sagði frá því að hann væri að taka upp vegan mataræði í viðtali við The Sun.

Simon verður sextugur í ár og hefur þegar sagt skilið við kjöt, mjólkurvörur, hveiti og sykur. Hann segir að nýja mataræðið hefur gert hann myndarlegri. „Ég var átta [af tíu] og nú er ég 11.“

Hann sagðist „ætla alla leið“ og mun því hætta að borða fisk til að verða alveg vegan.

Simon byrjaði að breyta matarvenjum sínum eftir að hafa dottið niður stiga í október 2017. Í kjölfarið fór hann að spá í óheilbrigða lífsstíl sínum.

„Ég tók út margt af því sem ég átti ekki að vera að borða og það var aðallega kjöt, mjólkurvörur, hveiti og sykur, þetta voru svona fjórir aðal hlutirnir,“ sagði Simon.

„Það var mun auðveldara en þú kannski heldur. Ég var vanur að fá mér jógúrt á morgnanna og nú fæ ég mér jógúrt úr möndlumjólk. Ég fæ mér möndlumjólk í tebollann,“ segir Simon.

„Ég get borðað ákveðna ávexti en ekki alla ávexti. Þú verður að fara varlega því sumir ávextir innihalda meiri sykur en kókdós. Um leið og þú hefur búið til ákveðið mynstur þá nýtirðu þess. Þetta hefur hjálpað mér að sofa og ég vakna ekki eins þreyttur. Ég fann mikinn mun á líðan minni á innan við viku. Ég hef meiri orku og athygli og það var ekki erfitt.“