Gestur Föstudagsþáttarins Fókus, hlaðvarpsþáttar dægurmáladeildar DV, að þessu sinni er áhrifavaldurinn og athafnakonan Lína Birgitta, konan á bak við vörumerkin Line the Fine og Define the Line. Lína hefur marga fjöruna sopið og var rétt skriðin yfir tvítugt þegar hún stofnaði sitt fyrsta fyrirtæki.
Lína er með tæplega sautján þúsund fylgjendur á Instagram, en hún var einnig gríðarlega vinsæl á Snapchat áður en hún færði sig yfir á Instagram. Hún segir mikinn misskilning ríkja um starf áhrifavalda.
„Það er mikill misskilningur að þú takir öllu,“ segir Lína. „Ef ég væri ekki að vinna á samfélagsmiðlum myndi ég hugsa: Er bara hægt að henda í hana páskaeggi og hún auglýsir það,“ segir Lína og hlær er hún útskýrir að áhrifavaldar auglýsa ekki allt sem hendi er næst. Lína er til dæmis á samningi hjá umboðsskrifstofunni CAI, Creative Artists Iceland, og sér umboðsmaður hennar um mikið af vinnunni á bakvið tjöldin.
„Í staðinn fyrir að ég sé að sjá um öll mál og email samskipti hafa fyrirtæki og aðilar samband við umboðsmanninn minn,“ segir hún og bætir við að umboðsmaðurinn hafi síðan samband við sig. „Þá segir hann til dæmis: Þessi var að hafa samband og okkur finnst þetta vörumerki passa vel við þig, viltu taka það?“ bætir hún við. Hún segist ekki taka hverju sem er því hún „vill ekki bendla sig við hvað sem er.“ Hún skilur þó að áhrifavaldar sem séu nýir í faginu geri það.
„Þegar þú ert að byrja þiggurðu vörur og gerir skiptidíla,“ segir hún. „Ég skil það þegar þú ert að reyna að koma þér á framfæri. Ég gerði það til að byrja með, en ég var ekki að taka öllu.“
Í dag vill Lína vera með fjóra til fimm langtímasamningi við ákveðin fyrirtæki sem hún hefur trú á.
„Ég er ekki í hverju sem er, alveg langt því frá. Það er oft sem maður neitar einhverju og þá er það ekkert illa meint um vörurnar eða þjónustuna,“ segir hún. „Ég vil að brandið þitt passi við mig og ég passi við brandið þitt,“ bætir hún við og segir jafnframt að áhrifavaldar hafi stundum samband við fyrirtæki af fyrra bragði ef þeim líst á vörur þess.
En verður maður ríkur af því að vinna á samfélagsmiðlum?
„Ríkur? Það fer eftir því hvað þú leggur í orðið ríkur en já, það eru peningar í samfélagsmiðlum. Það er hægt að fá góðan pening úr samfélagsmiðlum.“
Hægt er að fylgja Línu á Instagram með því að smella hér.
Hér fyrir neðan er hægt að horfa á Föstudagsþáttinn Fókus með Línu í heild sinni, en hlaðvarpsþáttinn má finna á öllum helstu efnisveitum, svo sem iTunes og Spotify.
