BBC skýrir frá þessu. Haft er eftir Hong Chi Ting, lækni á Fooyin háskólasjúkrahúsinu, að honum hafi verið brugðið þegar hann dró 4 mm langar flugurnar út úr auga konunnar.
Konan hefur verið útskrifuð af sjúkrahúsinu og reiknað er með að hún nái fullum bata.
Býflugur af þessari tegund laðast að svita og setjast stundum á fólk til að komast í svita þess. Þær drekka einnig tár því þau innhalda mikið af prótíni.
Þegar flugurnar fóru inn í auga konunnar taldi hún að ryk eða drulla hefði fokið í það. En augað var enn bólgið og hana verkjaði í það nokkrum klukkustundum síðar. Fór hún því á sjúkrahús og leitaði aðstoðar. Sem betur fer nuddaði hún ekki augað því það hefði getað fengið flugurnar til að framleiða eitur sem hefði gert konuna blinda.