Áttan er að breyta um stefnu. Nýja stefnan er afþreyingastöð á samfélagsmiðlum og hefur nafninu verið breytt í ÁttanMiðlar. Nökkvi Fjalar greinir frá þessu á Facebook.

„Þessi stefna hefur verið í framtíðarsýninni frá upphafi en við ákváðum í september að undirbúa þetta stóra skref. Eftir gífurlega mikla vinnu (miklu meiri vinnu en viðbjuggumst við) þurftum við að koma upp með plan svo að sem flestir myndu vita að þessari nýju stefnu,“ segir Nökkvi Fjalar.

„Merkið okkar hefur verið á milli tannana á fólki frá fyrsta degi svo við vildum nýta okkur það. Orri Einarsson í gervi hakkara fékk hálfa þjóðina til þess að fylgjast með. Grínið og þessi umdeilda kynning var allt á kostnað efnis sem við höfum unnið hörðum höndum af í gegnum tíðina“

Það vakti mikla athygli þegar það birtist myndband á öllum samfélagsmiðlum Áttunnar síðastliðinn mánudag. Í myndbandinu var grímuklæddur einstaklingur sem lýsti því yfir að öllum myndböndum Áttunnar hafi verið eytt og voru allir samfélagsmiðlar Áttunnar tómir.

Nú hefur komið í ljós að um kynningu hafi verið að ræða eins og Nökkvi Fjalar greinir frá.

Að lokum segir Nökkvi Fjalar:

„Við höfðum gaman að því að skjóta á það sem við höfum áður gert og erum um leið gífurlega spenntir fyrir nýjum áherslum! Takk fyrir að fylgjast með okkur, tala um okkur og einhverjum tilfellum hata okkur.“