Það er svokölluð kuldahringiða (polar vortex) frá norðurheimskautinu sem mun leggjast yfir Miðvesturríkin um miðja vikuna að sögn bandarísku veðurstofunnar US National Weather Service. Aðstæður verða lífshættulegar og fólk getur kalið og/eða ofkælst á nokkrum mínútum. Vindkæling mun gera það að verkum að í sumum borgum mun kuldinn verða meiri en hann hefur verið áratugum saman.
Á morgun er því spáð að kuldamet falli í Waterloo í Iowa en þar er spáð 36,6 stiga frosti. Í Chicago er nú þegar töluverður snjór og því er spáð að frostið fari niður í 29 stig á morgun. Svo mikið frost hefur ekki mælst þar síðan 1994. Með vindkælingu mun frostið jafnast á við 42,8 stig.
Í Minneapolis í Minnesota er spáð 34 stiga frosti en svo lágt fóru hitamælar síðast 1996. Með vindkælingu mun þetta jafnast á við 45,6 stiga frost.
Í Fargo í Norður-Dakóta verður kalt á morgun miðað við spár en þær gera ráð fyrir 37 stiga frosti sem mun jafnast á við 47,8 stig þegar búið er að reikna vindkælingu með.
Þá er víða spáð hvassviðri og snjókomu í ofanálag við þann snjó sem fyrir er. Nú þegar hefur mörg hundruð skólum, opinberum stofnunum og fyrirtækjum verið lokað af þessum sökum. Íbúar eru hvattir til að halda sig heima og gæta þess að eiga nægar birgðir af mat og drykk og eldivið eða gas til kyndingar.
Mörgum flugferðum hefur verið aflýst og neyðaráætlanir hafa verið virkjaðar víða. Kuldinn mun hafa áhrif á um 75 prósent bandarísku þjóðarinnar eða um 220 milljónir manna og mun teygja sig allt niður til Suðurríkjanna en þar verður kuldinn þó ekki í neinni líkingu við það sem verður í Miðvesturríkjunum. Þrjú dauðsföll hafa nú þegar verið rakin til kuldans.
