Það fór fram stórleikur í ensku úrvalsdeildinni í gær er Tottenham fékk lið Manchester United í heimsókn. Það var boðið upp á mjög skemmtilegan leik á Wembley en aðeins eitt mark var þó skorað.

Það gerði Marcus Rashford fyrir gestina í rauðu en hann skoraði eina mark leiksins eftir laglega sókn í fyrri hálfleik. Tottenham fékk svo sannarlega færi til að jafna metin en David de Gea var ótrúlegur í marki United.

Spánverjinn varði alls 11 skot í leiknum en kollegi hans hjá Tottenham, Hugo Lloris, þurfti einnig nokkrum sinnum að vera á tánum. United er enn í sjötta sæti deildarinnar en er nú með jafn mörg stig og Arsenal sem situr í fimmta sæti.

Gengi United hefur verið frábær undir Ole Gunnar Solskjær og var liðið að vinna sinn sjötta leik í röð.

Manchester Evening News segir frá því að Sir Alex Ferguson, fyrrum stjóri Manchester United hafi miklu meira að segja um málin en flestir halda.

MEN segir að Ferguson sé að aðstoða Solskjær við að velja byrjunarliðið, hvernig vinna eigi andstæðinga sína.

Ákvörðunin liggur á endanum hjá Solskjær en hann sækir ráð sín hjá Ferguson, það sást best í því þegar Ferguson mætti á æfingasvæði félagsins á dögunu og ræddi við leikmenn.

Solskjær hefur ekki verið að fela það að hann leitar í bækur Ferguson sem hætti sem stjóri United árið 2013. Solskjær lék lengi undir hans stjórn og veit hvað virkar best.