Eitt heitasta parið í dag er Ingibjörg Egilsdóttir, fyrrverandi fegurðardrottning, og Einar Egilsson tónlistarmaður, en þau hafa verið að draga sig saman síðustu mánuði samkvæmt heimildum DV.
Ingibjörg varð í öðru sæti í Ungfrú Ísland árið 2008 og ári síðar tók hún þátt í Miss Universe og komst í fimmtán kvenna úrslit. Í kjölfarið fékk Ingibjörg ýmis atvinnutilboð og starfaði víða um heim sem fyrirsæta.
Árið 2011 byrjaði Ingibjörg með Þorsteini M. Jónssyni, best þekktum sem Steini í Kók, þau skildu árið 2014. Eiga þau einn son saman. Sást hún eftir það í félagsskap kraftajötunsins Hafþórs Júlíusar Björnssonar (Fjallsins).
Einar skildi á síðasta ári við söngkonuna Svölu Björgvinsdóttur. Hún flutti heim til Íslands, en Einar varð eftir í Los Angeles í Bandaríkjunum þar sem þau höfðu haldið heimili undanfarin ár. Einar og Svala voru kærustupar í tæpan aldarfjórðung en þau giftu sig með pomp og prakt í Landakotskirkju í júlí 2013. Störfuðu þau mikið saman að tónlist og skipuðu meðal annars tríóið Steed Lord, ásamt Edda, bróður Einars. Svala hefur fundið ástina að nýju hjá Gauta Sigurðarsyni.
