Marta Guðjónsdóttir, borgarfulltrúi Sjálfstæðisflokksins, segir að Dagur B. Eggertsson borgarstjóri eigi að segja af sér strax vegna Braggamálsins. Marta skrifar pistil um málið á Facebook-síðu sína sem hún hefur vakið athygli fjölmiðla á:

„Dagur B Eggertsson hefur ráðið ríkjum í ráðhúsinu í Reykjavík frá árinu 2010 og hefur setið í borgarstjórn frá árinu 2002. Hann hefur því langa reynslu. Hann hefur í valdatíð sinni gert fjölda skipulagsbreytinga sem út á við áttu að tryggja örugga verkferla borgarkerfisins, auka skilvirkni og gegnsæi en voru fyrst og fremst gerðar í þágu pólitískra samherja. Að gefa honum kost á að moka yfir eigin mistök með enn einni nefndinni og enn einni skipulagsbreytingunni er ekki lengur í boði. Sá tími er liðinn. Þolinmæðin er á þrotum.  

Eyðslufylleríið, sem Innri endurskoðun hefur nú staðfest í skýrslu sinni, má rekja til þess að borgarstjóri sat auðum höndum í stað þess að bregðast við alvarlegum ábendingum Innri endurskoðunar árið 2015. Að lágmarki hefði hann átt að vera vakandi fyrir því sem gert var á skrifstofu þeirri í borgarkerfinu sem heyrir beint undir hann.

 Í þætti Kastljóss í gærkvöldi mátti heyra að borgarstjóri hefur engin svör. Honum ber skylda til að stjórna í umboði borgarstjórnar og fylgjast náið með rekstri og framkvæmdum borgarinnar. Það er engin afsökun fyrir hann að benda á að tilteknir embættismenn hafi látið undir höfuð leggjast að greina honum frá óheyrilegri framúrkeyrslu. Slíkur útúrsnúningur færir borgarstjóra ekki skjól og því miður er hann ekki trúverðugur. Miklu frekar dregur hann enn frekar úr trausti til borgarstjóra. 

Borgarstjóri getur ekki vikið sér undan  að axla ábyrgð í þessu alvarlega máli og ber að segja af sér strax.“

Mikill þrýstingur er nú á Dag vegna málsins, sjá nánar Mun braggamálið fella Dag?