Héraðsdómur Reykjavíkur hefur hafnað kröfu fjórmenninga Miðflokksins um gagnaöflun og vitnaleiðslur vegna fyrirhugaðrar málssóknar gegn Báru Halldórsdóttur, sem tók upp samtal sexmenninganna á Klaustri bar. Stundin greinir frá.

Ragnar Aðalsteinsson, lögmaður Báru, segist ætla að bíða og sjá hvert framhaldið verði:

„Þarna var nú ekki feitan gölt að flá svo við bjuggumst kannski frekar við þessu. En nú liggur fyrir erindi hjá Persónuvernd og þingmennirnir hafa boðað að þeir ætli í einkamál.“

Reimar Pétursson, lögmaður fjórmenninga Miðflokksins, hafði óskað eftir því að fá myndbandsupptökur úr öryggismyndavélum Alþingis og Dómkirkjunnar, og kallaði eftir dómkirkjupresti og skrifstofustjóra Alþingis fyrir dóm. Ekkert verður af því, eftir úrskurð Héraðsdóms Reykjavíkur, en komið hafði fram að engar eftirlitsmyndavélar væru á snærum Dómkirkjunnar og því engar upptökur til.

Taldi Reimar að með myndbandsupptökunum mætti sjá hvernig Bára hélt upptökunni leyndri og hvaða aðferðum hún hefði beitt til þess og hvort einhverjir hafi framkvæmt brotið með henni, en Bára hefur ávallt sagst hafa verið ein að verki.

Reimar sagði það einkennilegt að lögmaður varnaraðila mótmælti slíkri beiðni og spurði hverju Bára hefði að „leyna,“ Bára hefði talað um sig sem „boðbera gagnsæis á kostnað einkalífs“ í fjölmiðlum, en þegar spjótin beindust að henni sjálfri, væri viðkvæðið annað. Sagði hann að umbjóðendur sínir, Miðflokksþingmennirnir fjórir, grunuðu að frásögn Báru væri ekki „fyllilega heiðarleg“ og að þeir efuðust um trúverðuleika hennar.

Auður Tinna Aðalbjarnadóttir, verjandi Báru, tók fram að Bára hefði lýst atvikum ítarlega í viðtali við Stundina, en Reimar svaraði því til að það hefði enga lagalega þýðingu. Reimar minntist einnig á að Bára hefði lýst því yfir að hún væri ekki borgunarmanneskja fyrir greiðslu miskabóta ef til þeirra kæmi og sagði það ástæðu til að kanna hvort einhverjir hefðu verið með henni.