Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.

Gestur þáttarins í þessari viku er Tryggvi Guðmundsson, fimmfaldur Íslandsmeistari og markahæsti leikmaður í sögu efstu deildar á Íslandi. Tryggvi átti magnaðan feril, hann var óþolandi leikmaður að mæta. Skoraði mikið og vann titla.

Tryggvi ræði skemmtilega tíma í Eyjum sumarið 1996 er liðið hafnaði í fjórða sæti deildarinnar.

Það vakti athygli á þeim tíma þegar leikmenn ÍBV byrjuðu að fagna mörkum sínum á skemmtilegan hátt.

Eitthvað sem Stjarnan gerði síðar frægt á YouTube en Tryggvi minnir fólk á að fjörið hafi byrjað í Eyjum.

,,Við vorum aldrei með eitthvað svona lið sem gæti orðið Íslandsmeistari en fyrir okkur að vera við toppinn allt í einu var bara mjög gott,“ sagði Tryggvi.

,,Við vorum fullir sjálfstrausts og höfðum rosalega gaman að þessu. Við byrjuðum til dæmis á fögnunum árið 1996.“

,,YouTube var ekki til þá og þá segja allir að Stjarnan hafi byrjað á fögnunum en við byrjuðum á þeim.“

,,Við vorum í einhverju svona down tímabili þar sem það voru tveir eða þrír tapleikir og við vorum að pæla í því hvað við ættum að gera.“

,,Það kemur upp: ‘Hey, reynum að vera jákvæðir og gera eitthvað jákvætt. Hvernig væri að fagna almennilega þegar við skorum og sýna hversu ánægðir við erum með mörkin’.

,,Ég viðurkenni það alveg að sum fögnin voru flott en sum voru alveg út úr kortinu. Sum tóku mínútu og maður sá að andstæðingarnir voru ógeðslega pirraðir: ‘Eru þeir ekki að fara að taka miðju?’