David Moyes var lengi stjóri Everton á Englandi og var í guðatölu hjá stuðningsmönnum áður en hann tók við Manchester United.

Það eru ekki allir leikmenn sem stóðu sig vel undir Moyes hjá Everton en hann keypti ófáa leikmenn til félagsins.

Nefna má þá Diniyar Bilyaletidinov, James Beattie eða Andy van der Meyde sem stóðu ekki undir væntingum.

Leon Osman lék lengi undir stjórn Moyes og hefur nú nefnt verstu kaup hans hjá félaginu.

Osman talar um varnarmanninn Per Kroldrup sem kom til Everton frá Udinese árið 2005. Hann spilaði bara einn leik.

,,Stjórinn borgaði fimm milljónir fyrir hinn danska Per Kroldrup, sem var há upphæð fyrir varnarmann á þeim tíma,“ sagði Osman.

,,Á fyrstu æfingunni þá tók stjórinn hann til hliðar og byrjaði að æfa skalla, eins og þú gerir með sjö ára barn. Hann hélt á boltanum og sagði: ‘Ertu tilbúinn? Einn, tveir, þrír og hoppa!’

,,Það var ótrúlegt. Ég veit ekki hvað gerðist en hann hafði fattað það að Per var ekki öflugur í að skalla boltann. 5 milljónir fyrir hafsent sem getur ekki skallað…“

,,Þú getur verið eins hæfileikaríkur og þú vilt í úrvalsdeildinni en þú þarft að kunna að skalla boltann. Per kom frá Udinese í Serie A þar sem varnarmönnum leið vel á boltanum, voru góðir að staðsetja sig en voru ekki of líkamlegir.“

,,Það var eins og Per hafi ekki viljað skalla boltann sem var ótrúlegt fyrir hafsent. Hann eyddi svo sex árum hjá Fiorentina, hann var góður leikmaður en hentaði ekki úrvalsdeildinni.“