Áhorfendur sem sáu nýja heimildarmynd Peters Jackson um fyrri heimsstyrjöldina sátu límdir við sjónvarpið þegar myndin var frumsýnd í gærkvöldi.
Peter Jackson, sem er einna þekktastur fyrir þríleikinn um Hringadróttinssögu, er maðurinn á bak við myndina en í henni notar hann nýjustu tækni til að glæða hundrað ára gömul myndbönd nýju lífi. Er óhætt að segja að áhorfendur fái nýja sýn á þessa hörmulegu styrjöld sem geysaði árin 1914 til 1918.
Myndin var sýnd á BBC2 í gær í tilefni þess að þá voru hundrað ár liðin frá lokum stríðsins. Í myndinni er ljósi varpað á líf breskra hermanna í stríðinu og þá eru birt viðtöl við fjölmargar stríðshetjur – viðtöl sem hafa ekki sést opinberlega lengi og voru tekin á sjöunda og áttunda áratug liðinnar aldar.
Myndin hefur hlotið einróma lof gagnrýnenda og er til að mynda með einkunnina 8,9 á IMDB.com sem þykir býsna gott. Hefur Jackson verið hrósað mjög fyrir myndina.