Gavin Williamson, varnarmálaráðherra Bretlands, segir að á næsta ári verði 800 breskir hermenn sendir til Noregs til að vinna á móti auknum umsvifum Rússa á heimsskautssvæðinu. Hann segir að hermennirnir verði bæði úr hinum hefðbundnu hersveitum Breta en einnig úr úrvalssveitum hersins. Í Noregi á að opna nýja herstöð fyrir bresku hermennina að sögn Williamson.

Hann sagði þetta í samtali við Sunday Telegraph um helgina. Norsk stjórnvöld segja þó ekki rétt að Bretar muni opna herstöð í Noregi. Breskir hermenn muni verða í Noregi á veturna við æfingar ásamt norskum, bandarískum og hollenskum hermönnum og nýta sér aðstöðu í norskri herstöð.

Williamson segir að breska ríkisstjórnin sé að undirbúa „varnaráætlun fyrir Norðurheimsskautið“. Bresk yfirvöld vænta þess að Rússar muni halda áfram að auka umsvif sín á svæðinu og muni ganga harðar fram í olíuleit eftir því sem heimsskautaísinn bráðnar vegna hnattrænnar hlýnunnar.

„Við sjáum að kafbátaferðir Rússa eru komnar nálægt því að vera eins miklar og á tímum kalda stríðsins og það er því kominn tími til að við svörum því. Ef við viljum vernda hagsmuni okkar, nánast í bakgarðinum okkar, þá verðum við að gera þetta.“