Chelsea Clinton, dóttir Hillary og Bills Clinton, er afar virk í kosningabaráttu móður sinnar og mætir í spjallþætti til að mæra hana. Á dögunum mætti hún í sjónvarpsþátt Seth Meyers og hrósaði móður sinni vitanlega í hástert. Spurð hvað hefði verið mest spennandi við að búa í Hvíta húsinu í forsetatíð föður síns svaraði hún því til að feluleikir hefðu verið það sem henni hefði þótt skemmtilegast. Hún nefndi þrettán ára afmæli sitt í því sambandi en þá mættu allir vinir hennar í Hvíta húsið og fóru í feluleik og villtust margir í hinum ýmsu afkimum þessa stóra húss.
Chelsea mætti einnig í spjallþáttinn The View og ræddi um vináttu sína við Ivönku Trump, dóttur Donalds Trump. Hörð orð og grimmileg hafa fallið milli Hillary Clinton og Donalds Trump en dæturnar láta það ekki raska ró sinni. „Ég ber afar mikla virðingu fyrir Ivönku,“ sagði Chelsea. Hún sagði þær eiga mjög margt sameiginlegt, þær hafi lengi verið vinkonur og muni halda því áfram. Chelsea er 36 ára og börn hennar tvö eru tveggja ára og þriggja mánaða. Ivanka á þrjú ung börn. Chelsea sagði að sér þætti einnig afar vænt um eiginmann Ivönku og börn þeirra.
