Danskir vísindamenn hafa sýnt fram á að mikil glútenneysla á meðgöngu getur aukið líkurnar á að barnið fái sykursýki 1. Þetta er í fyrsta sinn sem sýnt er fram á tengls á milli neyslu glútens og sykursýki.

Politiken skýrir frá þessu í dag. Niðurstöður rannsóknarinnar eru jafnframt birtar í hinu viðurkennda vísindariti British Medical Journal í dag.

Politiken hefur eftir Julie Antvorskov, sem stýrði rannsókninni, að niðurstaðan sé mjög skýr og tölfræðilega marktæk. Þeim mun meira glútens sem móðir neytir á meðgöngu, þeim mun meiri eru líkurnar á að barn hennar fái sykursýki 1 síðar á ævinni.

Niðurstaða rannsóknarinnar sýnir að konur, sem borða mikið glúten á meðgöngu, eiga tvöfalt fleiri börn með sykursýki 1 en þær sem borða lítið glúten.

Það voru vísindamenn hjá Statens Serum Institut, rannsóknarstofnun ríkisins, sem gerðu rannsóknina. Þeir rannsökuðu 67.565 meðgöngur hjá 63.529 konum og fylgdust með börnunum í 15 ár. 247 börn höfðu þá greinst með sykursýki 1 eða 0,52 prósent af heildarfjöldanum. Til samanburðar kom í ljós að hjá mæðrum, sem borðuðu lítið glúten, fengu 0,3 prósent barnanna sykursýki 1.