Æviminningar Bryans Cranston, stjörnunnar úr Breaking Bad, koma út í þessari viku. Titill bókarinnar er A Life in Parts. Cranston var 52 ára gamall þegar hann fékk aðalhlutverkið í Breaking Bad og hreppti fern Emmy-verðlaun fyrir túlkun sína á kennaranum Walter White sem byrjar að selja eiturlyf til að sjá fyrir fjölskyldu sinni en breytist smám saman í skrímsli.
Leikarinn átti að eigin sögn góða æsku fram að ellefu ára aldri en þá yfirgaf faðir hans eiginkonu sína og þrjú börn þeirra og ekkert fréttist af honum fyrr en tíu árum síðar. Móðir Cranston fór að drekka ótæpilega eftir að eiginmaðurinn yfirgaf hana og gat ekki séð fyrir börnum sínum. Cranston var sendur í fóstur til afa síns og ömmu sem bjuggu við kröpp kjör. Hann segist enn finna fyrir sársauka vegna þess hvernig fór. „Faðir minn kaus að vera ekki hjá okkur og það var val móður minnar að drekkja sorgum sínum í áfengi. Hún varð skugginn af sjálfri sér. Og enginn útskýrði nokkurn tímann af hverju hann fór.“
Cranston segist hafa fyrirgefið foreldrum sínum en bæði eru látin. Móðir hans lést háöldruð úr Alzheimer. Faðir hans kom aftur inn í líf barna sinna. Eftir lát hans fundu börn hans pappírsblað á heimili hans og á því stóð: „Besta stund lífs míns var þegar börnin mín fyrirgáfu mér.“
