Erik Hamren mun stýra íslenska landsliðinu í fyrsta sinn í byrjun september er liðið mætir Sviss og Belgíu í Þjóðadeildinni.
Hamren hefur ekki fengið mikinn tíma með strákunum í landsliðinu og fær ekki vináttuleiki til að undirbúa sig.
Það var ómögulegt að spila vináttuleiki fyrir leikina tvo þar sem leikmenn hafa verið að spila með sínum félagsliðum.
,,Ég get ekkert af því gert. Ef ég fengi að ráða þá hefði ég viljað einn eða tvo vináttuleiki til að hitta leikmennina þó að úrslitin væru ekki mikilvæg,“ sagði Hamren.
,,Þú getur einnig snúið því við og horft á þetta með jákvæðum augum, nú erum við að spila mótsleiki og það er það sem leikmenn vilja og þess vegna erum við að þessu. Af hverju ekki að byrja bara á því.“
,,Þetta er risastór áskorun gegn Sviss og Belgíu. Við ættum að vera númer þrjú á listanum af þessum liðum. Við viljum vinna alla leiki sem við spilum, það er markmiðið en við vitum hversu erfitt þetta verður. Við verðum að spila mjög vel til að ná því.“
