Sigurkarl Gústavsson, lögreglumaður, gefur ekki mikið fyrir þau orð dómsmálaráðherra, Sigríðar Á. Andersen, um að fé til löggæslumála og aukning á fjárheimildum hafi aldrei verið eins mikil og nú um stundir, líkt og ráðherra sagði við Vísi.
Sigurkarl hyggst bjóða Sigríði á vakt með sér, svo hún sjái með eigin augum þörfina á frekari fjárveitingum í löggæslumál:
„Ætli sé ekki best að bjóða henni blessaðri á vaktina með manni ? 8-12 tímar stöðugt í einhverskonar ati og að reyna að halda viti eins langt og það nær undir miklu álagi og viðhalda þjónustustigi og virðingu stéttarinnar! Ég formlega býð Sigríði Á. á vakt með mér til að finna hve vel aurunum hennar er varið til löggæslumála
“
Sigríður vísaði því á bug að illa væri búið að lögreglunni, þó svo það liggi fyrir að verkefnum hennar hafi fjölgað og niðurskurður óumflýjanlegur. Til marks um fáliðunina í lögreglunni, eru 15 lögreglumenn á næturvakt á öllu höfuðborgarsvæðinu á virkum dögum. Þeir sinna samtals sjö sveitarfélögum, eða um 200.000 manns.
Sigríður segir málið snúast um forgangsröðun á fé og mati á þörf fyrir fjölda lögreglumanna:
„Rekstaráætlun er lögð fram fyrir öllu embættin og þau hafa heimild til þess að forgangsraða og hreyfa við henni innan ársins. Það held ég til dæmis að lögreglustjórinn á höfuðborgarsvæðinu hafi gert í byrjun ársins. Hún sé því í þeirri stöðu í dag að tryggja það að vera innan rammans núna í lok ársins. Það er hennar val hvernig hún forgangsraðar þessu fé. Staðreyndin er sú að fé til löggæslumála og aukning á fjárheimildum hefur aldrei verið eins mikil og nú um stundir. Ef það eru fimmtán lögregluþjónar á næturvakt í Reykjavík, þá er það vegna þess að þannig hefur þörfin verið metin. Eins og ég hef margoft bent á að frá árinu 2014 hafa lögreglan og löggæslumál fengið auknar fjárheimildir umfram nánast allar aðrar stofnanir ríkisins.“
Nú er bara spurning hvort Sigríður áþekkist boð Sigurkarls um rúntinn.
