Gylfi Þór Sigurðsson var svekktur í dag eftir 2-0 tap Íslands gegn Nígeríu í öðrum leik riðlakeppninnar.
Gylfi klikkaði á vítaspyrnu í 2-0 tapi Íslands í dag en Ísland fékk víti er sjö mínútur voru eftir.
,,Þetta er auðvitað mjög svekkjandi, sérstaklega eftir að við spiluðum fyrri hálfleikinn mjög vel,“ sagði Gylfi við Rúv.
,,Við vorum mjög opnir í seinni hálfleik sem var ólíkt okkur og þeir nýttu skyndisóknirnar og við fengum auðvitað víti til að minnka muninn en það er erfitt að taka þessu.“
,,Ég hitti ekki markið, það er mjög einfalt. Það er svosem lítið hægt að segja annað en það.“
,,Það er erfitt að segja hvað fór úrskeiðis svona stutt eftir leik en ef við lítum snöggt á það þá ætluðum við okkur of mikið of fljótt frekar en að vera rólegir eins og í fyrri hálfleik.“
