Nígeríumenn reyna nú allt hvað þeir geta að kreista fram úrslit í síðustu tveimur leikjum riðlakeppninnar á HM, gegn Íslandi og Argentóinu. Yfirvöld þar í landi hafa ákveðið að hækka bónusgreiðslur til leikmanna ef þeir ná að vinna Ísland í Volgograd á föstudag.

Nígería tapaði fyrsta leiknum gegn Króatíu á laugardag og staðreyndin er sú að tap gegn Íslandi á föstudag sendir Nígeríu úr keppni eftir riðlakeppnina.

Fyrir mótið fékk hver leikmaður loforð um bónusgreiðslur upp á 1,1 milljón króna fyrir hvern sigur í keppninni. Til að hvetja leikmenn enn frekar hefur nú verið ákveðið að hækka þessar greiðslur upp í 1,6 milljónir króna. Það var Solomon Dalung, íþróttamálaráðherra Nígeríu, sem tók þessa ákvörðun.

„Það var leiðinlegt að vinna ekki (gegn Króatíu) en sigur hefði blásið mönnum baráttuanda í brjóst. En við missum ekki vonina. Yfirvöld gera sitt besta til að tryggja að Nígeríu gangi vel í Rússlandi. Jafnvel forsetinn, Muhammadu Buhari, hvatti liðið til dáða í gær,“ sagði Salomon þegar ákvörðun um bónusgreiðslurnar var kynnt.

Ísland mætir Nígeríu í Volgograd á föstudag og mun sigur Íslands auka líkur okkar á sæti í 16-liða úrslitum til mikilla muna. Það er þó ekki víst að fjögur stig dugi Íslandi en það mun fara eftir úrslitum annarra leikja í riðlinum.